Почетокот на тенискиот натпревар меѓу чешката тенисерка Петра Квитова (21. ВТА) и Американката Бернарда Пера (42. ВТА) на турнирот во Гвадалахара доцнеше поради пчели.
Имено, пчелите се појавија на судиското столче и поради тоа сите беа принудени да чекаат додека проблемот не се реши.
Судијата Марија Чичак од Хрватска едноставно не можеше да се качи на своето столче, па тенисерките воопшто не излегоа на теренот.
На крајот пристигна помош и пчелите беа безбедно отстранети, што воедно било знак дека натпреварот може да се одигра.
Инаку, Чехинката ја оправда улогата на фаворит и триумфираше по нешто помалку од 90 минути игра победувајќи со 6:3 и 7:5.
„Атмосферата на натпреварот навистина зуеше“, напиша Квитова на Twitter со емотикон на пчела.
Многу корисници на социјалните мрежи истакнуваат дека ова не е ништо ново за овој мексикански град, па постои можност пчеларите повторно да бидат повикани да реагираат во продолжението на турнирот.