Успехот на фудбалската репрезентација на Македонија не ги одмина ни претседателот Стево Пендаровски, ни премиерот Зоран Заев, кои синоќа преку социјалните мрежи ја коментираа победата над Косово.
Претседателот Пендаровски упати честитка до фудбалерите изјавувајќи дека се гордее со нив и посака да се победи и Грузија и да се пласираме на ЕУРО.
Она што збунува е крајно нејасната порака упатена од премиерот Зоран Заев кој покрај честитки зборуваше и за некакво добрососедство кое требало да се негува наспроти головите кои биле само бројка. Фудбалот се игра за победа, не за добрососедство бидејќи не е ни важно кој е противникот, туку важно е да се победи и да се оствари целта. Упати честитки и за добрата игра на противникот, веројатно или не го гледал натпреварот, или некој друг му ја пишувал честитката, бидејќи реално, фудбалските познавачи знаат дека и двете репрезентации не само што не покажаа добар фудбал, туку очаен.
В очи паѓа и тоа што и двајцата избегнаа да нагласат која држава играше вчера, освен Косово. Како претседател и премиер, јасно е дека се обврзани да го користат новото официјално име Северна Македонија, но веројатно знаејќи дека токму поради тоа име нивните честитки ќе предизвикаат негативни реакции од јавноста, прескокнаа да спомнат која земја победи синоќа против Косово.
А, македонските фудбалери по последниот свиреж на холандскиот судија прославија на центарот на теренот едногласно пеејќи „Македонија“ и „Едно име имаме“.