Стратегот на Манчестер Сити откри кого смета за најталентиран играч со кој играл за време на својата играчка кариера.
Жузеп Гуардиола денеска беше во италијанскиот град Кунео каде одржа говор пред 3.500 студенти.
„Мислам дека талент има насекаде, па така и во Италија. Талентот не се развива дома, на Instagram или Twitter. Тоа е невозможно. Се развива со вежбање и правење грешки. Ако сакате да играте фудбал професионално, тогаш морате многу да го играте“, рече каталонскиот стратег, помеѓу останатото.
На прашањето кој е најталентираниот играч со кој делел соблекувална за време на својата кариера како играч, Пеп одговори без многу да размислува.
„Дефинитивно тоа е Роберто Баџо“, јасен беше Пеп.
Пред некоја година во една прилика за Баџо рече: „Ако Баџо играше во денешниот фудбал, ќе постигнуваше 50 гола по сезона. Нема сомнеж за тоа. Не мислам само со мене или Манчестер Сити, мислам на кој било тренер и кој било тим. Роби беше феномен кога играше, во основа само со една добра нога и во италијански фудбал во кој во тоа време беше многу тешко да преживее напаѓачот. Во тоа време имаше многу малку простор, а најмногу четири-пет шанси по натпревар, но секогаш успеваше да постигне гол и тоа често во неверојатни околности. Роби беше таму со Диего Марадона, Марко ван Бастен, Франческо Тоти, Алесандро Дел Пјеро...“.
Роберто Баџо ги одбележа 80-тите и 90-тите години на минатиот век играјќи за Виченца, Фиорентина, Јувентус, Милан, Болоња, Интер и последно Бреша, каде ја заврши кариерата во 2004 година. Токму во редовите на Бреша настапуваше заедно со Пеп, кој летото 2001 дојде од Барселона, играше една сезона, па се пресели во Рома, за по шест месеци повторно да се врати во Бреша.
За репрезентацијата на Италија одигра 56 натпревари и постигна 27 голови, но никогаш не освои трофеј. Дури и беше трагичар на финалето од Мундијалот 1994 во САД кога против Бразил го промаши одлучувачкиот удар од белата точка во пенал-рулетот. Има и бронза од Мундијалот 1990.
Во Серија А има одиграно 459 натпревари и постигнато 205 голови. Освои по едно Скудето со Јуве и Милан, како и една Копа Италија и еден УЕФА куп со Јуве.
