Портпаролот на Кремљ, Дмитриј Песков, во интервју за Sky News призна дека руските загуби во Украина се значителни.
Тој изјави дека историјата на Украина се промени во 2014 година.
„Украина стана антируска, сè што се случи во Украина потоа беше насочено против нашата земја“, изјави Песков и додаде дека Русија „со децении била загрижена за својата безбедност“.
На новинарско прашање дали војната излезе како понижување за Русија, со оглед на бројот на загинатите војници, тој изјави:
„Не, тоа е погрешна слика за тоа што се случува“, изјави прво тој, но потоа призна: „Имаме значајна загуба на војници. Тоа е голема трагедија за нас“.
Новинарот на Sky News, Марк Остин, го праша Песков за снимките на мртвите тела низ улиците на Буча.
„Сето тоа е измислено, тоа е лажно“, кажа Песков,
На овој одговор новинарот реагираше: „Сфаќате ли колку гротескно звучи тоа?“
„Снимките од Буча се лажирани. Неколку дена зборуваме за тоа, но никој не сака да нè слушне. Тоа сè може да биде лага. Понекогаш мора да се посомневаме во тоа што ни се пласира“, одговори Песков. „На сателитска снимка може да ставите кој било датум“, изјави Песков и додаде дека руските власти наскоро детално ќе дадат одговори на овие прашања.
