Легендарниот италијански фудбалер Филипо Инѕаги објави автобиографија во која изнесе неколку интересни информации од својата богата кариера, а една од нив е дека поради тренерот Масимилиано Алегри се пензионирал порано отколку што планирал.
Популарниот Пипо откри дека тогашниот тренер на Милан, кој сега седи на клупата на Јувентус, бил тој кој инсистирал да му биде раскинат договорот, иако имал договор со челниците на клубот да остане уште една година.
„Беше пролетта 2012 година и постигнав договор со клупските челници да останам уште една година. Паоло Малдини, Алесандро Неста, Андреа Пирло, Џенаро Гатузо и Кларенс Сејдорф за краток период го напуштија Милан, па беше договорено да останал за да ја 'држел' соблекувалната“, напиша Инѕаги.
Сепак, според Инѕаги, тоа не му се допаднало на тренерот Алегри кој побарал да не му биде понуден нов договор, што подоцна клубот и го прифатил.
„Директорот Адриано Галиани беше воодушевен што треба да останам и лесно се договоривме. Сепак, Алегри тогаш рече дека не ме сака во соблекувалната и дека треба да го напуштам клубот. Целосно ме 'разнесе' и ја завршив кариерата“, откри Инѕаги.
Автобиографијата на Инѕаги во продажба излезе денеска, а La Gazzetta dello Sport е медиумот што го откри интересниот детаљ. Со наслов „Il momento giusto“ (Вистинскиот момент), Инѕаги ја напиша со помош на новинарот Г.Б. Оливеро, кој работи токму за Gazzetta.
