Со само 24 години Килјан Мбапе веќе е легенда на францускиот фудбал и многу време ќе пројде додека не се појави некој со нему слични квалитети, вели поранешниот капитен на француската репрезентација, славниот Мишел Платини.
Според зборовите на човекот што одбележа една ера на европскиот и светскиот фудбал и кој беше претседател на УЕФА, играч каков што е напаѓачот на ПСЖ тешко се наоѓа.
„Килјан Мбапе веќе е легенда на францускиот фудбал, како што е и Зинедин Зидан. Тој всушност е онаков каков што секој напаѓач би требало да биде. Брз, силен, одлично игра и со лева и со десна нога, а покрај тоа е многу интелигентен и умее да ја чита играта“, вели Платини.
Според зборовите на легендарниот француски фудбалер, Мбапе нема да се помири додека во дресот на ПСЖ не ја освои Лигата на шампионите.
„Мислам дека тоа ќе се случи, а кога ќе ја освои титулата европски шампион, тогаш веројатно ќе продолжи по друг пат. Кога тој ќе посака. Мислам дека неговата следна дестинација може да биде Шпанија или Англија, но кој знае, можеби еден ден ќе отиде и во САД“, смета легендарниот фудбалер, но и поранешен контроверзен претседател на УЕФА.