Предводникот на ПСЖ во пресрет на вечерашната дерби пресметка против најтрофејниот клуб во Лигата на шампионите упати само пофални зборови за својот противник.
Со дуелите ПСЖ - Реал Мадрид и Спортинг - Манчестер Сити вечерва од 21 часот почнува осминафиналето во Лигата на шампионите. Токму дуелот во Париз го привлекува вниманието на фудбалските вљубеници бидејќи е дуел на сонувачи и шампиони.
Маурисио Почетино е на клупата на „Светците“ чиј газда вложи милиони, но никако да дојде до целта - освојување на Лигата на шампионите.
„Имаме огромна почит за Реал Мадрид, еден од најдобрите тимови во светот. Не се освојуваат 13 титули во Лигата на шампионите поради тренерите, тоа е поради целокупната силина на клубот“, вели аргентинскиот стратег.
„Ние сме предизвикувачи, многу напор е вложен во градењето на тим кој ќе го оствари нашиот сон, но ние сепак сме предизвикувачи, а Реал Мадрид се тие кои имаат навика да ја освојуваат Лигата на шампионите“.
„Но, тоа не значи дека се чувствуваме како жртви. Јас верувам во мојот тим, во мојот клуб и во нашите навивачи кои ќе ни дадат голема доза на енергија“.
Најголемиот адут на ПСЖ, Лео Меси, е подготвен и ќе игра вечерва, на задоволство на Почетино.
„Во натпревари како овој многу важно е искуството, па тој може да одигра клучна улога префрлајќи го тоа кон неговите соиграчи“.
Почетино додаде и дека „со оглед на играчите на теренот, ова би можело да биде и финале“, но за жал еден од овие два великана ќе мора да се соочи со рана елиминација.
„Нема никаква потреба да се остриме за овој натпревар затоа што секој е веќе силно мотивиран и многу возбуден за играње и за да му помогне на тимот на секој можен начин“, заврши тој зборувајќи на официјалната прес-конференција.
Натпреварот ќе го суди искусниот италијански арбитар Даниеле Орсато.
