Малечкиот Хаидар, кој два дена беше заглавен во бунар на длабочина од 10 метри, почина само неколку моменти откако беше извлечен на површина, пренесоа авганистанските медиуми.
Информациите за смртта на момчето ја потврди Анас Хакани, виш советник во Министерството за внатрешни работи на Авганистан.
„Со голема тага соопштуваме дека шестгодипниот Хаидар засекогаш е одвоен од нас“, изјави Хакани.
Иако спасувачите два дена без престан се трудеа да дојдат до детето, во текот на копањето се соочиле со низа препреки кои ги спречиле да продолжат со копањето.
„Спасувачкиот тим се соочи со нова препрека, камен ги спречува подлабоко да копаат. Загрижени сме дека прашината може да падне врз детето и веројатно на тој начин би го изгубиле“, изјави портпаролот на авганистанската полиција неколку часа пред да биде потврдена смртта на детето.
Сепак, и покрај бројните препреки копањето продолжи, но за жал, предоцна.
Малиот Хаидар во вторникот се лизнал на дното на бунарот што го копаат во местото Шошак, оддалечено 400 километри југозападно од Кабул. Дедото Хаџи Абдул Хади за AFP изјави дека Хајдар паднал во бунарот кога тој се обидувал да помогне во ископувањето.
Првично детето паднало на дното на бунарот по што со јаже успеале да го извлечат на околу 10 метри од површината на земјата,
Трагедијата во Авганистан следи само неколку дена откако светот сведочеше за трагичните сцени од Мароко, кога со денови траеше акцијата за спасување на петгодишниот Рајан, кој падна во бунар.
За жал, исто како со случајот на детето од Авганистан, и малиот Рајан почина веднаш по спасувањето.
