На 79-годишна возраст почина Луиџи Рива, еден од најдобрите фудбалери во историјата на Италија.
Минатата недела Рива беше подложен на серија медицински тестови откако беше пренесен во болница и внимателно следен од лекарите.
Сепак, неговата состојба се влоши и Италија сега се збогува со една од своите најголеми легенди.
Рива е најдобар стрелец на италијанската фудбалска репрезентација, а постигна 35 гола на 42 натпревара). Со Италија го освои Европското првенство во 1968 година, а потоа и среброто на Мундијалот две години подоцна во Мексико.
За Каљари одигра 374 натпревари во сите конкуренции и постигна 207 голови. Џиџи е легенда на овој клуб, со кој во сезоната 1969/1970 го освои Скудетото, единственото во витрините на Каљари.
25 години ја извршуваше функцијата директор на италијанската репрезентација. Освен Кањари, една сезона играше и за Лењано.
Веста за смртта на Рива стигна синоќа додека во Саудиска Арабија се играше италијанскиот Суперкуп. На полувремето на стадионот во Ријад му беше оддадена почит со минута молчење од страна на играчите на двете екипи, Интер и Наполи.