Со новата година почнува новиот деловен план на Renault во кој нема место за некои класици.
Првиот човек на Renault, Лука де Мео, на 14 јануари ќе ја претстави „ренолуцијата“ (Renaulution), за која во моментов малку се знае. Automobilwoche дознава дека фокусот на планот е насочен кон намалување на трошоците, што значи гасење на неперспективните производи.
Изданието вели дека Де Мео сака да ја намали гамата на Renault за 30%, што значи дека една од првите жртви треба да биде штотуку реставрираниот Talisman. Минатата година беа продадени нешто повеќе од 16.400 примероци. Некои претходни извештаи покажуваа дека треба да заминат и Scenic и Espace, исклучително звучни имиња на францускиот автомобилски бренд.
Renault, наводно, ќе штеди и во технолошка смисла, со пофокусиран развој на одредени комерцијално исплатливи решенија. Исто така е можно компанијата да се повлече од некои пазари. Две работи се сигурни: едната е дека алијансата останува заедно, а втората е дека електрификацијата ќе има најголемо влијание.