Арапските пари почнаа да влегуваат и во кошарката, откако по воспоставувањето соработка со НБА лигата решија да преговараат со Евролигата, што може да резултира со промена на името на натпреварувањето, но и со вклучување на клуб од ОАЕ.
На состанокот одржан во Дубаи, шеиците ѝ понудиле на Евролигата повеќегодишен договор вреден меѓу 50 и 60 милиони евра по сезона за правото на име на натпреварувањето кое би се викало Emirates Airlines EuroLeague, пишуваат грчките медиуми.
Оваа компанија би го заменила Turkish Airlines како насловен спонзор на Евролигата, која моментално за тоа право плаќа 10 милиони евра годишно.
Минатата сезона шампионот на Евролигата беше награден со 1,5 милиони евра, односно десет пати помалку отколку што добиваат фудбалските клубови со учеството во групната фаза од Лигата на шампионите.
Дубаи исто така понуди да го организира Фајнал-форот на Евролигата на три години во својата Coca-Cola Arenа, а шеиците исто така сакаат да основаат клуб кој би се приклучил на натпреварувањето со покана.
„Возбудени сме поради потенцијалот на Евролигата во Дубаи, со нетрпение очекуваме да го продолжиме разговорот“, се вели во соопштението на Евролигата.
Да потсетиме, Дубаи веќе воспостави соработка со НБА лигата, па минатата недела таму Милвоки Бакс и Атланта Хокс одиграа два претсезонски натпревари.