Американската фармацевтска компанија Eli Lilly and Company соопшти дека дека ги запрела клиничките испитувања на терапија против COVID-19 што беа спонзорирани од американската Влада.
Според светските новински агенции, причината е безбедноста на терапијата.
Eli Lilly and Company не коментираше кои ќе бидат импликациите од прекинувањето на клиничките испитувања.
Компанијата претходно овој месец соопшти дека ќе аплицира за итна дозвола за употреба на терапија со антитела, лекот LY-CoV555, за пациенти со умерена до средно тешка форма на COVID-19, врз основа на податоците собрани во друго клиничко испитување.
Eli Lilly and Company е производител на лекови против COVID-19 кои содржат антитела, слични на оние што му беа препишани на американскиот претседател Доналд Трамп.
На видеото што минатата недела го објави на социјалните мрежи, тој ја претстави терапијата со антитела произведени од Eli Lilly and Company, заедно со терапијата на компанијата Regeneron како лек за COVID-19.
Објавата на Eli Lilly and Company дојде еден ден откако компанијата Johnson&Johnson соопшти дека е принудена привремено да го прекине тестирањето на својата експериментална вакцина против коронавирусот, откако еден доброволец необјасниво се разболе. Компанијата соопшти дека сè уште не знае дали лицето примило вакцина или плацебо.
