HBO Max повторно го одложи снимањето на специјалната епизода на „Friends“ во која актерите од славната ТВ-серија требаше да се соберат по 16 години.
Специјалната епизода беше најавено дека ќе се снима во студио пред публика, исто како десетте сезони на серијата. Но, плановите на продуцентите беа изместени поради пандемијата на коронавирус, па решено е да се чека „поповолна клима за снимање“, вели извор за Variety.
Актерската екипа долго време ги држеше во тајност информациите за снимањето на специјалното шоу, а само што потврдија дека повторно се собираат, почна пандемијата со коронавирусот. Тоа ги поремети плановите, а фановите се загрижија дека проектот нема никогаш да се реализира. Снимањето требаше да почне на почетокот на март, но продукцијата беше ставена на пауза, како и остатокот од филмската и ТВ продукција во САД и светот.
„Се надеваме декаќе може да почнеме со снимање во август, ако сѐ е добро и нема втор бран. Ако сѐ биде на свое место и ги почитуваме сите мерки, ќе снимаме во средината и крајот на август“, рече во јуни креаторката на шоуто Марта Кауфман. Екипата ги споделуваше идеите за шоуто преку видеоповици за време на карантинот.
Како што HBO Max соопшти во февруари, специјалната епизода ќе биде едночасовна собиранка на актерите од „Friends“: Џенифер Анистон, Кортни Кокс, Лиса Кудроу, Метју Пери, Дејвид Швимер и Мет Лебланк.
„The one where they got back together“, соопшти тогаш HBO Max во стори на Instagram (или „Епизодата во која сите пак се собраа заедно), алудирајќи на специфичните наслови на посебните епизоди во серијата што се емитуваше од 1994 до 2004 година.
„Екипата на Friends повторно ќе се собере за ексклузивно едновечерно шоу на HBO Max“, стоеше во објавата под хаштаг #FriendsReunion.
Сите оригинални актери од серијата ќе се вратат на оригиналната сцена Stage 24 во студиото Warner Bros. Studio во Бурбенк, Калифорнија, за специјалното шоу во чест на серијата. Секако, ова не значи дека се обновува серијата, туку е само паметен потег на актерите и на продуцентите да ја искористат обновената популарност на серијата, во време кога има огромна носталгија по 90-тите.
Според сајтот Deadline, за овој ангажман секој од „Пријателите“ ќе добие астрономски хонорар од 3 до 4 милиони долари. Во последните две сезони од серијата што се емитуваше од 1994 до 2004 година актерите добиваа по 1 милион долари по епизода.
