Околу 20 Авганистанки демонстрираа во Кабул, извикувајќи „леб, работа, слобода“ против рестрикциите кои ги воведоа талибанците за жените во Авганистан, пренесе AFP.
Од враќањето на власт во август, 2021 година, талибанците постепено ја одзедоа слободата што жените ја освоија во последните 20 години од падот на претходниот режим.
„Школувањето е мое право. Отворете ги повторно училиштата“, скандираа жените пред Министерството за образование, носејќи превез преку лицето.
Маршираа неколку стотина метри пред да бидат запрени од талибанците кои дојдоа да ги спречат во протестот.
„Сакавме да прочитаме изјава, но талибанците не ни дозволија“, изјавија тие по маршот. „Ни ги зедоа мобилните телефони и нè спречија да фотографираме или снимаме од протестот“.
По враќањето на талибанците, воведени се низа рестрикции и во голема мера се уназадени правата на жените. Ги исклучија од јавните професии, им го ограничија правото на движење, им забранија пристап на девојчињата во училиште и слично.
