Себастијан Алварес се запиша во историјата како првиот човек кој успеал да влета и излета од кратер на активен вулкан. Неговиот спектакуларен лет успешно го изведе во регионот Арауканија во родното Чиле.
Поранешниот воен пилот мина цела година подготвувајќи се за лет низ кратерот на еден од најопасните вулкани во Чиле. Алварес како локација совршена за проектот го означи вулканот Виларика кој не само што има голем кратер со пречник поголем од 200 метри туку и опкружување кое ја доловува природната убавина на неговата татковина.
Во месеците додека се подготвувал за летот, Алварес минал доста време на вулканот за да дознае повеќе за притисокот на воздухот, брзината на ветрот и чадот од него. Покрај проучувањето на вулканот, Алварес пропатувал и низ дел на Европа и Јужна Америка и извел околу 500 скокови во склоп на подготовка за својот неверојатен подвиг.
Кога се почувствувал подготвен за реализација на проектот, ги чекал совршените услови бидејќи вулканот Виларика е еден од најопасните во Чиле и често еруптира. Клучен бил изборот на вистинскиот момент за прелет.
Во одело со крила успеал да се симне околу 10 метри длабоко во вулканот пред да излета од него надвор.
„За оние кои не знаат ништо за оделата со крила, Себастијан во суштина со своето тело влета во активен вулкан и излета од него. Само со своето тело, без мотор, со помош на парче ткаенина“, изјави Дани Роман кој го снимаше Алварес во акција.
