ПСЖ синоќа, еден ден подоцна од очекуваното, го заврши есенскиот дел од европската сезона со победа од 5:1 над Башакшехир, на повторениот натпревар што беше прекинат во вторникот поради расистички инцидент.
Со 12 бода, „Светците“ го освоија првото место во групата Х и ќе ја имаат предноста на домашниот терен на реваншот во осминафиналето.
Двете најголеми ѕвезди на Париз си ги поделија улогите на стрелци и постигнаа прекрасни јубилеи. Килјан Мбапе со два гола ја мина границата од 20 гола, а Нејмар со хет-трик постигна 40 погодоци во Лигата на шампиони.
Изминатава година и за двајцата се зборува дека ќе го напуштат ПСЖ. Младиот Мбапе е најголемата желба на Реал Мадрид, а Нејмар беше во фаза на големо незадоволство и сакаше да се врати во Барселона. Но, откако стигнаа до финале на ЛШ во пандемиска сезона, работите се променија и двајцата можно е да останат во клубот на долг рок.
„Започнавме преговори за да ги задржиме и Мбапе, и Нејмар. Верувам дека ќе бидат успешни затоа што и двајцата сакаат да останат“, изјави сопственикот на ПСЖ, Насер Ал Хелајфи, за RMC SPort, а Мбапе го потврди истото за медиумите.
„Среќен сум во Париз, со клубот и соиграчите. Не сакам да го напуштам ПСЖ“, рече тој.
Иако синоќа Мбапе стана најмладиот играч во историјата со 20 погодоци во Лигата на шампиони, главна ѕвезда беше Бразилецот. Покрај тоа што постигна хет-трик, тој постигна и пенал кој го реализираше Мбапе, имаше уште две клучни додавања и едно создаде одлична можност. Тој шутираше осум пати, а шест топки влегоа во шеснаесетникот, од кои половина завршија во мрежата.