Друштвото на писателите на Македонија традиционално го распиша Конкурсот за доделување на наградата „Даница Ручигај“ за најдобра поетска книга од писателка-членка на ДПМ, објавена во тековната година.
Во конкуренција за ова признание ќе влезат стихозбирките објавени од септември 2022 година до крајот на септември 2023 година. Авторките и издавачите треба да достават по четири примероци во канцеларијата на ДПМ, најдоцна до 1 ноември 2023 година.
Доделувањето на оваа награда е дел од активностите на Клубот на писателките-членки на ДПМ, што го носи името на познатата македонска поетеса Даница Ручигај, која загина во скопскиот земјотрес во 1963 година.
Еден од иницијаторите за воспоставување на наградата, која првично била за најдобра дебитантска поетска книга, е Искра Чоловиќ. Прва добитничка на наградата, во 2005 година, била тогаш 15-годишната поетеса Надица Лешникоска, ученичка во гимназијата „Георги Димитров“ во Скопје, за збирката „Копрена“.
Наградата „Даница Ручигај“ досега ја добиле Елена Пренџова, Бистрица Миркуловска, Љерка Тот Наумова, Билјана Станковска, Марина Мијаковска, Мирјана Тренчева, Љубинка Донева и Вања Изова Велева.
