Берзанските индекси на Волстрит забележаа раст денеска, по големиот пад минатата недела, но тргувањето беше неизвесно во очекување на одлуките и пораките на американската централна банка за каматните стапки.
Откако го забележаа најголемиот пад од јуни минатата недела, индексите вчера закрепнаа дел од загубите, но тргувањето беше претпазливо. На тоа укажува слабиот обем на тргување. Само 9,58 милиони акции се сменија, што е шести најнизок дневен обем оваа година. Ова е резултат на неизвесноста на инвеститорите во однос на зголемувањето на каматните стапки од страна на американската централна банка.
Повеќето аналитичари очекуваат лидерите на ФЕД да ги зголемат клучните каматни стапки за 0,75 процентни поени трет пат по ред на дводневниот состанок, кој завршува во среда. Сепак, откако минатонеделните податоци покажаа дека инфлацијата во САД е повисока од очекуваната во август, се шпекулира дека ФЕД може да ги зголеми каматните стапки за цел процентен поен.
„Сите очи се вперени во ФЕД и чекаме што ќе одлучат и кажат челниците на централната банка во среда. Мислам дека тргувањето ќе биде слабо дотогаш“, вели Џош Маркман, партнер во Bel Air Investment Advisors.
Инвеститорите стравуваат дека инфлацијата би можела да остане на високи нивоа подолго од очекуваното, што би го принудило ФЕД да ја заостри монетарната политика и во наредната година.
А тоа може да ја доведе економијата во подлабока рецесија. Технички, американската економија веќе западна во рецесија, имајќи предвид дека во последните два квартали паѓа на квартална основа, но засега оваа рецесија е плитка.
На пазарот на капитал негативно влијае и забавувањето на растот на глобалната економија, како што предупредија минатата недела Меѓународниот монетарен фонд и Светската банка.
Од овие причини вчера паднаа цените на акциите на повеќето европски берзи. Лондонскиот FTSE индекс ослабе за 0,62 отсто, на 7.236 поени, а париски CAC за 0,26 отсто, на 6.061 поен. Франкфуртски DAX зајакна, пак, за 0,49 отсто, на 12.803 поени.