Според најновите информации, во соседна Србија во изминатите 24 часа се регистрирани 7.818 случаи на заразени со коронавирусот SARS-CoV-2.
Во истиот временски период починале 57 пациенти со COVID-19.
Во Србиија има 289 пациенти со COVID-19 поставени на респиратор.
Во изминатите 24 часа беа направени 20.514 тестови за COVID-19.
Епидемиологот Предраг Кон во врска со можните предлог мерки против епидемијата пред претстојните празници, кога се очекува доаѓање на голем број луѓе од странство, вчера изјави дека медицинскиот дел на Кризниот штаб предложил на границите да се прават PCR тестови за коронавирус.
-Алтернативата е влез на голем број луѓе кои не знаат дека се заразени, а кои ќе добијат симптоми и ќе треба да се лекуваат во Србија, кажа Кон за ТВ Прва.
Тој истакна дека најважно е да се разгледа пристигнувањето на српските државјани од странство.
-Тука мора да се направат подготовки, ќе мора да има карантин и изолации, за што ќе се разговара на следниот состанок. Затворањето на границите е тешко, но медицинскиот дел од кризниот штаб нема да има ништо против ако тоа биде државна мерка, истакна Кон.
Запрашан да ги коментира извештаите во медиумите дека веќе има закажувања за новогодишни прослави, Кон одговори дека „не е реално да се очекува дека ќе бидат укинати сите мерки (ограничувања на собири) за толку кратко време“, дури и да станува збор за оние што ја прележале короната и кои се чувствуваат „безбедни“.
Кон за ТВ Прва изјави дека проблемот е во тоа што и понатаму е потребна голема хоспитализација поради COVID-19, поради што голем број белграѓани сè уште се лекуваат надвор од Белград, без оглед на новата болница во Батајница, и дека издржливоста на здравствениот систем е на нејзините крајни граници.
