Вистинска конфузија синоќа предизвика официјалната веб-страница на Премиер лигата каде меѓу пријавените фудбалери на Манчестер Јунајтед се најде и извесен Бетињу.
Бетињу преку ноќ стана славен. Станува збор за португалски напаѓач со целосно име Алберту Алвеш Коељу, кој со своите 29 години има постигнато само 27 гола во кариерата, а моментално игра во третата португалска лига за тимот на Ешпињу.
Но, во Премиер лигата, поради некоја причина, тој беше вклучен во тимот на пријавени играчи на Манчестер Јунајтед. До неговото име стоеше бројот 11 и се наведуваше дека за „Црвените ѓаволи“ игра од 2019 година.
Ова, се разбира, не е точно, а потегот на официјалната веб-страница на Премиер лигата предизвика многу збунетост и шеги на социјалните мрежи. Но, тоа што некои тоа не го сфатија како шега, потврдува и фактот што видео-компилациите од неговите потези во текот на кариерата десеткратно го зголемија бројот на прегледи на социјалните мрежи.
Угледниот The Athletic ја разоткри оваа бизарна приказна. Мистериозниот фудбалер Бетињу нема да заигра за Јунајтед, а кога на „Олд Трафорд“ го виделе овој проблем веднаш стапиле во контакт со челниците на Премиер лигата.
Се покажа дека се работи за техничка грешка која официјалната веб-страница на Премиер лигата се обидува да ја поправи.
„Најважно е да се каже дека Манчестер Јунајтед нема да потпише со играчот Бетињу, новата 11-ка во нивниот тим на официјалната веб-страница на Премиер лигата. Тоа нема никаква врска со клубот, а Манчестер Јунајтед веднаш ја известил Премиер лига. Тоа е технички проблем и персоналот работи на корекција на грешката“, истакна новинарката Лори Витвел, која работи за The Athletic.
Нормално, и самиот Бетињу се изненадил кога видел дека е вклучен во тимот на Јунајтед, па приликата ја искористи за да се пошегува и им порача на сонародниците Диогу Дало и Бруну Фернандеш дека наскоро ќе се видат на тренинг.
