Норвежанецот Ерлинг Холанд (23) е напаѓач на кој му треба неверојатно малку за да ја испрати топката во голот, но и не е баш играч кој ќе си создаде шанса или ќе учествува во создавањето шанса.
Слабостите на Холанд беа целосно прикажани во ремито без голови на Манчестер Сити против Арсенал, во кое Норвежанецот беше еден од најлошите играчи на теренот.
Повторно почнаа критиките кои зачестија оваа сезона откако Холанд потфрли на речиси сите натпревари каде се очекуваше тој да биде човекот на одлука.
Проблемите во играта на Норвежанецот ги детектираше и легендарниот капитен на Манчестер Јунајтед, Рој Кин, со коментар за неговите фудбалски способности кои ги смета за многу ниски.
„Многу лошо. Неговата генерална игра е многу слаба. Пред голот тој е најдобар во светот, но генерално е многу лош. Неговата игра е на ниво на играчи од нашата четврта лига. Мора тоа да го подобри во следните години и ќе го подобри. Сепак, мора да го направи што е можно поскоро“, изјави Кин.
Бројките одат во прилог на славниот Ирец бидејќи Холанд е неверојатно смртоносен на натпреварите каде доминира неговиот тим, што не е случај кога игра дерби.