Руската влада го одобри списокот на странски земји и територии кои спроведуваат непријателски дејствија против Русија, според наредбата од кабинетот.
На листата се наоѓаат САД и Канада, земјите членки на ЕУ, Обединетото Кралство, Украина, Црна Гора, Швајцарија, Албанија, Андора, Исланд, Лихтенштајн, Монако, Норвешка, Сан Марино, Северна Македонија, како и Јапонија, Јужна Кореја, Австралија, Микронезија, Нов Зеланд, Сингапур и Тајван, пренесе руската новинска агенција ТАСС.
Наредбата е изготвена со претседателски декрет, потпишан од Владимир Путин на 5 март 2022 година.
Според документот, Владата, руските граѓани и компаниите кои имаат девизни долгови кон странските кредитори од списокот на непријателски земји ќе можат да ги платат во рубљи.
Според информациите од руската Влада, главната цел на оваа мерка е да се обезбеди финансиска стабилност на државата во услови на наметнати надворешни санкции.
