Руски војник кој во битка во Украина уништил тенк Leopard од германско производство, добил награда од 1 милион рубли (11.842 долари) од приватна фондација, соопшти руското Министерство за одбрана. На видеото објавено од Министерството, војникот Андреј Кравцов седи на болнички кревет и прима награда од Александр Карелин, трикратен олимписки шампион во борење грчко-римски стил.
Министерството не соопшти кога и каде Кравцов го уништил тенкот, или за што се лекува во болница.
Русија вели дека нејзините сили уништиле голем број борбени возила Leopard од германско производство и Bradley испорачани од САД, откако Украина започна контраофанзива на почетокот на овој месец.
Министерството за одбрана на Русија минатата недела соопшти дека исплатило индивидуални бонуси на повеќе од 10.000 руски војници од почетокот на војната во Украина, која Москва ја нарекува специјална воена операција, за уништување или заробување на украинска или западна опрема.
Предавајќи го сертификатот за приватниот бонус, Карелин му рекол на Кравцов: „Ова се прекрасни бонуси за оние што предизвикуваат значителна штета на непријателот, згора на она што го прави државата“.
