Рускиот фудбалски сојуз (РФС) поднесе барање до Европската фудбалска федерација (УЕФА) и до Светската фудбалска асоцијација (ФИФА) да биде суспендиран селекторот на Украина, Олександр Петраков.
Рускиот фудбалски сојуз го обвинува Олександр Петраков за дискриминација на Русите и одбивање да одржи неутрална политичка позиција, пишува британски Guardian.
Писмо до комисијата на УЕФА за контрола, етика и дисциплина напиша заменик генералниот секретар на РФУ Денис Рогачев. Како доказ тој ги наведе цитатите на Петраков во италијанскиот Corriere dello Sport и рускиот Спорт-Экспресс.
„РФС се обрати до ФИФА и УЕФА, во врска со изјавите на селекторот на украинската репрезентација, кои се јасно дискриминаторски во однос на Русија и граѓаните на нашата земја. Сметаме дека таквите изрази се недозволиви, што беше ставено на внимание на ФИФА и УЕФА. Писмото беше испратено во јуни, сега чекаме одлука“, соопштија од РФС.
Претходно Петраков повика на исклучување на Русите од сите меѓународни спортски натпреварувања.