Откако стана сопственик на Њукасл, инвестициската група предводена од Саудискиот јавен инвестициски фонд сака да го купи Интер.
На чело на фондот е Мохамед бин Салман, саудиски принц и прв човек по кралот во Саудиска Арабија. Управува со владата на неговиот татко, кралот Салман бин Абдулазиз и е најмоќен човек во државата.
Кинеските сопственици на Интер имаат големи финансиски проблеми поради кои летово мораа да ги продадат Ромелу Лукаку и Ашраф Хакими. Клубот, по освојувањето на титулата, поради лошите финансии го напушти и тренерот Антонио Конте.
Семејството Жанг размислува за продажба на италијанскиот шампион, се споменува износ од милијарда евра. Првите разговори за тоа веќе се одржани минатиот месец, со претставници од Фондот.
Саудијците бараат најлесен начин како да ги заобиколат правилата на УЕФА да не можат во ист момент да бидат сопственици на два клуба кои играат во европски натпревари.
„Долгорочно ваквата ситуација е неодржлива за Интер и нешто сигурно ќе се промени во сопственичката структура на Интер во 2022 година“, пишува италијанска La Stampa.