Фудбалерите на Јувентус добија забрана да ја коментираат новонастанатата ситуација откако Италијанската фудбалска федерација одлучи драконски да го казни клубот од Торино со одземање на 15 бодови, па во соблекувалната се вклучи црвениот аларм.
Имено, италијанските медиуми пренесуваат дека Леонардо Бонучи и Данило веќе утрово побарале итна средба со клубот, за од прва рака да дознаат што се случува со Јувентус и што носи иднината.
„Старата дама“ речиси цела деценија „пумпаше“ трансфери и со трикови дојде до предност пред другите клубови во Италија.
Поради тоа останаа без управата која го овозможи тоа, а пристигна и ново раководство кое треба да го стабилизира клубот.
Сепак, поради проблемите кои го потресоа клубот од Торино, прашање е колку фудбалери ќе останат, а најмногу се зборува за заминувањето на српскиот напаѓач и најскап играч на Јувентус, Душан Влаховиќ.
Минатиот зимски преоден рок дојде за 80 милиони евра за да игра во Лигата на шампионите, па бидејќи се споменува интерес од Англија, нема да биде изненадување ако Влаховиќ побара трансфер.
Влаховиќ не е единствениот незадоволен од состојбата во Јувентус, а по кризната средба меѓу играчите, тренерот и новата управа, ќе се знае повеќе и каков е планот.
Секако, Јувентус ќе се жали на одлуката за одземање на бодови.
