Македонскиот репрезентативец Столе Димитриевски во јануари би можел да стане нов голман на каталонскиот гигант, барем така тврди познат шпански новинар.
Хосе Алварес во емисијата „El Chiringuito de Jugones“ даде, како што вели, екскузивна вест која тој ја дознал. Тврди дека Барселона сака да се ослободи од резевниот голман Нету, а на негово место сака да го донесе нашиот Столе Димитриевски и тоа сега веднаш, во јануарскиот преоден рок.
Димитриевски игра одлична сезона за Рајо Ваљекано, кој пак е изненадување на сезоната бидејќи иако лани беше второлигаш, сега се бори за место во Лигата на шампионите и со 30 бодови е на 4. место.
Кон крајот на октомври Рајо ја победи Барса со 1:0, нашиот Столе одигра цел натпревар и освен што не прими гол од гигантот, туку и му одбрани пенал на Мемфис Депај.
Сезонава Столе ги одигра сите 18 натпревари на кои прими 18 голови, а на 6 ја зачува мрежата незатресена. Згора на тоа, тој во Ла Лига води според бројот на одбрани, па не е чудо што Барса го сака токму него.
Број еден меѓу стативите кај Каталонците е Марк-Андре тер Штеген, а Столе треба да биде негова замена. Во клубот не се задоволни од неговата форма, па затоа им треба на клупата добра замена.
Иако ваков трансфер звучи надреално, сепак да оставиме времето да покаже дали Столе Димитриевски може да стане првиот Македонец кој заиграл за Барселона. Претходно, блиску до такво нешто беше Давид Бабунски, кој изникна од Ла Масија и играше за вториот тим, но не успеа да се пробие во првиот иако често тренираше со Меси и дружината.
Родум од Куманово, Димитриевски голманскиот занает го изучи во Работнички од каде како 19-годишен потпиша за Удинезе кој веднаш го прати на позјамица во Кадис. Следуваше позјамица и во Гранада која потоа и го откупи. Каталонското поднебје не му е непознато бидејќи бранеше и за Жимнастик пред да премине во Рајо. За репрезентацијата на Македонија, каде со години е прв избор, има 52 настапа.
Доколку се оствари трансферот на Столе во Барса, ќе мора да се помири со фактот дека ќе биде резерва на Тер Штеген, но тоа не значи и дека нема да добива шанса. Кој знае, можеби ќе се избори за единицата...
