Швеѓанката Лорин е победничка на 67. издание на Изборот за песна на Евровизија со песната „Tattoo“. Синоќа во Ливерпул се одржа финалето на споменатото музичко натпреварување на кое таа освои 583 поени.
На второ место заврши Финецот Каарија кој ја отпеа „Cha Cha Cha“. Тој освои 526 поени. Третото место го зазеде израелската пејачка Ноа Кирел со песната „Unicorn“ освојувајќи 362 поена.
Најлошо помина германскиот метал бенд „Lord of the Lost“ со само 18 поени. Ниту претставничката на Обединетото Кралство, Меј Мулер (28 поени), ниту репрезентативецот на Србија, Лук Блек (30 поени), не се прославија.
Лорин беше миленик на обложувалниците од самиот почеток. Од претставувањето на песната „Tattoo“ сите очи беа вперени во пејачката, а со 8 милиони стримови на Spotify таа беше и број еден на шведската Топ 50 листа.
Во 2012 година Лорин победи на Евровизија во Баку со песната „Euphoria“. Лорин потоа се најде во среде скандал бидејќи се сретна со локални активисти за човекови права кои ѝ кажале за недостатокот на демократија во поранешната советска држава. Подоцна таа на новинарите им рече дека во Азербејџан секојдневно се кршат човековите права и дека таквите работи не треба да се премолчуваат.
Портпаролот на владата на Азербејџан изјави дека натпреварувањето не треба да се политизира и побара од организаторите на Евровизија да спречат вакви средби. Шведските дипломати одговорија дека Лорин не постапила спротивно на правилата на Изборот за песна на Евровизија.
Во 2017 година, Лорин во една емисија изјави дека е бисексуалка, што предизвика ентузијазам кај нејзините обожаватели кои припаѓаат на ЛГБТ заедницата. Во меѓувреме, таа стана нивна миленичка. Рече дека на нив им го должи својот голем успех во музичката индустрија.