Ромео Бекам, син на прославениот англиски фудбалер Дејвид Бекам, моментално тренира со тимот на Брентфорд каде се обидува да се избори за договор.
Младиот 20-годишен Ромео сѐ уште е под договор со МЛС тимот на Интер Мајами, чиј сопственик е токму неговиот татко Дејвид. Меѓутоа, како што пишува Times, синот на мајсторот за слободни му се приклучил на Брентфорд каде тренира обидувајќи се да го импресионира стручниот штаб на чело со данскиот стратег Томас Франк.
Доколку се избори за шанса, раскинувањето на договорот со тимот од сојузната држава Флорида нема да претставува никаков проблем со оглед на тоа што татко му е газда на клубот. Желба на самиот Дејвид е неговиот син да тргне по неговите стапки и да успее да заигра во Премиер лигата.
Овој потег е тотално изненадувачки со оглед на тоа што на Ромео Бекам никогаш не се гледаше како на голем талент, ниту пак на играч кој би можел да направи кариера во англискиот фудбал. Меѓутоа, штом популарните „Пчели“ се согласиле Ромео да дојде на проба, можеби сепак има нешто во него.
Не е познато колку време ќе остане на проба, а дали ќе успее да се избори за договор, останува времето да покаже. Засега Ромео тренира со вториот тим, на Брентфорд, но доколку се покаже како можно засилување ќе биде прекомандуван во првиот тим.
Оваа информација доаѓа точно 19 години откако неговиот татко Дејвид ја напушти Премиер лигата и од Манчестер Јунајтед се пресели во Реал Мадрид.
Интересно, младиот Ромео до 2014 година тренираше со Арсенал, но тогаш одлучи фудбалот да го замени со тенис. Тениската кариера неуспешно ја градеше до 2021 година кога изненадно потпиша за клубот на татко му и повторно му се врати на фудбалот.