Почнаа вакцинациите против COVID-19, а со нив дојдоа и нови проблеми.
Обидот на Медицинскиот универзитет во Варшава за подигање на свеста за значењето на вакцинацијата против COVID-19 може да ѝ се „удри од глава“ на оваа институција, бидејќи се поставува прашањето зошто славни луѓе добиле вакцина пред припадници на разни ризични групи.
Скандалот започна во четвртокот кога Медицинскиот универзитет во Варшава соопшти дека примил дополнителни 450 дози од вакцината на кои им истекува рокот на важност на новогодишната ноќ на полноќ.
Универзитетот реши брзо да ја искористи вакцината, истовремено зголемувајќи ја свеста за важноста на вакцинацијата со имунизација на 300 вработени.
Останатите 150 дози беа распределени на членовите на семејствата на вработените, на некои пациенти, како и на 18 познати личности од светот на уметноста и културата во земјата.
Познатите веднаш прифатија предлогот да бидат амбасадори на вакцинирањето против COVID-19.
Портпаролот на универзитетот не сакаше да ги открие имињата на славните за полската новинска агенција PAP.
Но, можноста за добро вмрежени луѓе да го скокнат редот и да се рангираат меѓу првите приматели на вакцината ја разгневи јавноста. Нема доволно вакцини и повеќето држави развија план за вакцинирање кој им дава предност на ризичните групи и медицинскиот персонал.
Полскиот министер за здравство Адам Ниџилски најави проверки и рече дека непочитувањето на процесот е апсолутно неприфатливо и вчера изјави дека одговорните ќе сносат последици.
Според полскиот план, први треба да бидат вакцинирани здравствените работници.
