Словенечкиот велосипедист Тадеј Погачар ќе биде вкупен победник на 108. издание на Тур де Франс, откако по вчерашната трка на хронометар ја одбрани предноста пред конкурентите и спроти завршната етапа може да почне да ја слави одбраната на титулата.
Погачар (УАЕ Тим Емирејтс) спроти вчерашниот 30,8 километри долг хронометар од Либурн до Сент-Емилјон имаше 5,45 минути предност пред Данецот Јонас Вингегард (Џамбо-Висма) и 5,51 минута пред Еквадорецот Ричард Карапас (Инеос Гренадиерс).
Освојувајќи го 8. место во 20-тата етапа на Тур де Франс, словенечкиот велосипедист успеа да ја одбрани предноста и денеска треба само да ја извози последната славеничка етапа до Елисејските полиња за и официјално да ја потврди својата втора последователна победа на Трката околу Франција.
