Советот на Град Скопје со 19 гласови „за“, 5 „против“ и 4 „воздржани“ денеска усвои амандман поднесен од советничката група на ВМРО-ДПМНЕ за доделување финансиска помош од 15 милиони денари на ФК Вардар. Градоначалничката Данела Арсовска оцени дека со оваа помош „ќе се наполнат туѓи џебови или ќе се исплатат извршителите“ и ја повика Финансиската полиција да изврши контрола во клубот.
Таа истакна дека е потреба сериозна анализа и изнаоѓање на соодветно трајно решение за овој проблем, барајќи клубот да се врати под ингеренции на Град Скопје.
– Од 2021 година клубот го има преземано фирма којашто го однела во втора лига. Таа фирма нема исполнето ниту една од обврските согласно договорот за купо-продажба, односно исплата на обврските од над два милиона евра којашто ги презела за да може да го води ФК Вардар, истакна Арсовска.
Таа додаде дека Градот Скопје нема никакво влијание и контрола на одлуките на оваа фирма, и дека со одлуката за помош наместо да се реши целиот проблем, ќе се доделат 250 илјади евра на приватни фирми коишто го имаат донесено ФК Вардар во оваа состојба, а притоа Градот нема да има никаков удел ниту во контролата, ниту во тоа што се случува таму.
– Освен што ќе ги наполниме џебовите на приватна фирма и што ќе ги наполниме џебовите на извршители коишто ја имаат блокирано сметката на фудбалскиот клуб, јас не гледам дека нешто друго ќе реализираме. Што ќе исполниме со ова? Сметам дека прво треба да повикаме една акција на Финансиската полиција, сите надлежни институции, да влезат внатре, да видат на кој начин работи и функционира ФК Вардар во изминатата година, истакна Арсовска.
Советникот од редовите на ВМРО-ДПМНЕ, Владимир Нелоски, изјави дека фудбалерите веќе четири месеци немаат земено плата и мора да се изнајде системско решение за во иднина да не се случува ова.
– ФК Вардар е во многу големи проблеми и да не е во сопственост на градот, но за состојбата во која што се наоѓа можеме да бараме вина во претходното раководство на Градот и немањето слух да преземе чекори за да не дојде клубот во оваа состојба во која се наоѓа, односно во втора лига со милионски долгови, посочи Нелоски.
Вардар по 12 одиграни кола во 2.МФЛ се наоѓа на второто место, каде викендов падна од лидерската позиција откако киксираше играјќи само 1:1 дома против Беласица. Лидер е Гостивар со 30 бодови, еден повеќе од Вардар, додека трета е Воска Спорт со 27. Првопласираните две екипи на крајот од сезоната ќе изборат пласман во првата лига. Вардар втора сезона по ред игра во второлигашката конкуренција.
