Познатиот холивудски актер Двејн Џонсон, познат и како Рок, се испроба во улогата на рапер и гостуваше во песната „Face Off“ на Tech N9ne.
Иако многу негови пријатели со години се обидуваа да го убедат да се приклучи на хипхоп сцената, Џонсон дури сега се согласи да го земе микрофонот во раце:
„Многу од моите пријатели се големи рап ѕвезди и многупати ме замолија да учествувам во снимање песна. Не се согласив. Решив дека ќе прифатам такво нешто кога ќе почувствувам дека треба. И сега е таа ситуација“.
„Ја сакам музиката, секогаш кога имам можност да работам на проекти што вклучуваат создавање музика - јас секогаш уживам во тоа“, рече Џонсон за Variety.
Тој додава дека се запознал со раперот Tech N9ne на снимањето на серијата „Ballers“ и дека се поврзале тогаш поради нивната исклучителна посветеност и љубов кон работата. Токму нивниот однос кон работата го инспирираше да ги напише стиховите за песната „Face Off“.
„Го снимив мојот дел од првпат, потоа му го испратив на Tech и тој веднаш ентузијастички одговори дека тоа е тоа, имаме хит“, се сеќава Џонсон со насмевка.
