Уште една непријатна ситуација со автомобилите на Tesla.
Електричен автомобил Tesla S Plaid се запалил во возење, само три дена откако ова возило, за кое биле платени 129.900 долари, му било доставено на сопственикот во САД.
Адвокатот на сопственикот на автомобилот, Марк Герагос, рече дека неговиот клиент управувал со автомобилот кога возилото се запалило и не можел на почетокот да излезе од автомобилот затоа што откажал електронскиот систем на вратите, што го принудило клиентот „да употреби сила при отворање“.
Автомобилот продолжи да се движи околу 11 до 12 метри, пред да се претвори во „огнен факел“ во станбена населба во близина на куќата на сопственикот во Пенсилванија.
„Тоа беше болна и застрашувачка сцена. Ова е сосема нов модел... Истрагата е во тек. Апелираме дека S Plaid не треба да биде пуштен во сообраќај, да не биде по патиштата додека не заврши истрагата“, рече Герагос.
Моделот Plade S беше лансиран на пазарот во јуни. Од Tesla сè уште не одговориле на барањето на Reuters за коментар за инцидентот.