Ако можеше Вардар да донесе играч од четвртата италијанска лига, Работнички од шестата англиска, Тиквеш може уште подоле - резервист од андорската лига!
Пролетниот дел во најдобрата македонска лига, а една од најслабите во Европа, почнува викендов. Клубовите веќе се екипирани, а некои сѐ уште носат нови играчи кои како слободни агенти (но, со навреме подигнати документи од претходните клубови) можат сѐ уште да потпишат.
Кој да биде победник во замисленото натпреварување Најлош трансфер беше тешка одлука. Дали Вардар со засилувањето кое македонските спорстки медиуми го најавија како „играч од Динамо Загреб“ иако таму никогаш не заиграл за првиот тим, а дојде од четвртата италијанска лига, пак или Работнички со Турчинот од шеста англиска лига и Алжирецот резерва во алжирската лига. Изборот сепак одлучивме да падне на Тиквеш.
Имено, гордоста на Кавадарци се пофали дека потпишал со Адриен Габриел Амадио Графин, 20-годишен напаѓач, висок метро и 90, роден во САД кој има и бразилско и француско државјанство. Играл за Серану од Рио, играл и футсал за Чикаго Мустангс, а потоа бил во младинската академија на бразилскиот второлигаш Новоризончину. Вака сѐ делува екстра, но...
Графин во Тиквеш доаѓа од редовите на Ондино, моментално шестопласираниот тим во најдобрата лига на Андора, каде се приклучил летоска. Не само што андорската лига по квалитет е на самото дно од европските лиги, дури послаба и од македонската, туку дечково ни таму не можел да се пробие. Најчесто не го викале за играње, а кога го викале го ставале на клупа. Само трипати влегол во игра и тоа еднаш поиграл 11 минути, а двапати влегувал во 90-та минута за да се задржува време.
Американецот за своето неиграње доби награда - трансфер во троа посилна лига, 1.МФЛ. И во клуб, без потценување кон Ондино, ама 99% подобар - Тиквеш.
Засилување за мерак, нема што! Ако ништо друго, се надеваме ракијата и виното ќе му се допаднат.
Тиквеш в недела пролетниот дел го почнува со гостување во Штип кај Брегалница. Шанса за Графин да се покаже...
