Apple и Sony го објавија првиот трејлер за епската историска драма Napoleon, во режија на режисерот Ридли Скот.
Трејлерот е прегледан 11 милиони пати за помалку од 24 часа. Филмот доаѓа по неуспехот на последната историска драма на Скот - The Last Duel од 2021 година.
Заплетот на филмот ќе се фокусира на подемот на Наполеон на власт и неговата бурна врска со царицата Жозефина. Филмот ќе прикажува и динамични борбени сцени низ кои може да се види воениот и тактичкиот гениј на Наполеон.
Главните улоги ги толкуваат оскаровецот Хоакин Феникс како Наполеон Бонапарта и Ванеса Кирби, позната по филмот Pieces of a Woman, како Жозефина де Богарне. Покрај нив, во актерската екипа се и Тахар Рахим, Бен Мајлс, Лудивин Сање, Метју Нидам, Јусеф Керкур, Фил Корнвел, Пол Рајс, Џон Холингворт и Марк Бонар.
Сценариото за филмот го напиша Дејвид Скарпа, кој работеше со Ридли Скот на филмот All the Money in the World од 2017 година.
Филмот е втора соработка на Скот со Феникс, кој глумеше во неговиот филм Gladiator од 2000 година. Извршни продуценти на филмот се Рејмонд Кирк, Ејдан Елиот и Мајкл Прус.
Филмот ќе биде премиерно прикажан во кината на 22 ноември оваа година, а подоцна ќе биде достапен и на платформата за стриминг Apple TV+.