Извршниот директор на Tesla загуби во обидот да ја одложи тужбата против гигантот од социјалните мрежи до следната година.
Судијата во американската сојузна држава Делавер одреди датум за судската пресметка меѓу Илон Маск и Twitter некаде во октомври, наведувајќи дека со дополнително одложување „се заканува непоправлива штета“ за компанијата, која се обидува да го принуди милијардерот да го заврши преземањето вредно 44 милијарди долари.
Адвокатскиот тим на Маск се обиде да ги одложи сослушувањата до февруари следната година, додека Twitter побара судење уште во септември.
Претставникот на компанијата го обвини милијардерот за „обид за саботажа“ и дека „дава сѐ од себе за да го уништи Twitter“. Адвокатот на Twitter, Вилијам Савит, тврди дека „постојаната неизвесност предизвикана од наводното откажување на Маск секојдневно му нанесува штета на Twitter, секој час од секој ден“.
„Колку подолго е одложувањето, толку е поголем ризикот“, се согласи во вторникот во пресудата главниот судија на Канцеларскиот суд во Делавер, канцеларката Кеталин Сент Џуд МекКормик. Судијата им остави на странките да се договорат за точниот датум на судењето, освен ако дотогаш не постигнат спогодба.
Twitter минатата недела поднесе тужба против Илон Маск во обид да го принуди да го исполни ветувањето да ја купи компанијата за 44 милијарди долари или 54,20 долари по акција. Најбогатиот човек на светот се откажа од договорот, обвинувајќи ја компанијата за „материјално кршење на повеќе одредби“ во врска со прашањето за лажни или бот сметки на платформата. Тимот на Маск не се согласи со проценката на Twitter за бројот на овие типови на сметки, според кои се само 5% од корисниците, велејќи дека компанијата направила „лажни претставки“.
Гигантот на социјалните мрежи за возврат го обвини милијардерот дека преговара со лоша намера. „Откако организираше јавен спектакл за да го стави Twitter во игра, и откако предложи, а потоа потпиша договор за спојување погоден за продавачот, Маск очигледно верува дека тој… е слободен да го промени своето мислење, да ја уништи компанијата, да го наруши нејзиното работење, да ја уништи вредноста на акционерите, и да си замине“, се наведува во тужбата.
