Европската куќа на фудбалот на навивачите на Ливерпул ќе им ги рефундира трошоците за влезниците за минатогодишното финале од Лигата на шампионите што се играше во париското предградие Сен-Дени.
УЕФА ќе им ги врати парите на сите навивачи на Ливерпул кои имаа влзеница за финалето 2022 во француската престолнина. Оваа одлука, која УЕФА ќе ја чини милиони евра, е само уште една потврда на независниот Панел дека УЕФА, како организатор на финалето, е единствениот виновник за сѐ што се случуваше пред и по натпреварот.
„Зедовме предвид бројни ставови и изјави, изнесени јавно и приватно, па сметаме дека пронајдовме начин кој е прифатлив и праведен за решавање на оваа ситуација. Ја цениме помошта од организацијата на навивачите на Ливерпул, Spirit of Shankly, и Здружението на навивачите инвалиди на Ливерпул, како отворен и транспарентен дијалог кој се одвиваше периодов“, стои во соопштението на УЕФА.
„Ги разбираме негативните искуства на навивачите од тој ден и одлучивме да им вратиме пари на сите навивачи што купиле влезници и што беа најмногу погодени од целото случување пред стадионот“, додава Унијата со седиште во Нион.
Така, УЕФА ќе врати пари за 19.618 влезници. Навивачите најефтината од тие влезници ја плаќаа по околу 70 евра, додека најскапите карти чинеа 690 евра. Грубо земено, враќањето пари ќе ја чини УЕФА околу 3 милиони евра.
Независна комисија минатиот месец утврди дека УЕФА сноси примарна одговорност за хаосот што настана воочи финалето во кој учествуваа полицијата и обезбедувањето, навивачите на англискиот клуб не знаеле дека купиле фалсификувани билети.
Натпреварот на стадионот „Стад де Франс“ почна со задоцнување од 36 минути откако навивачите на Ливерпул не можеа да влезат.
