Украинската фудбалска лига нема да биде продолжена и никој нема да биде прогласен за шампион, бидејќи во земјата во сила е вонредна состојба поради руската инвазија.
Откако Русија на 24 февруари почна војна против Украина во оваа земја не е одигран ниту еден фудбалски натпревар.
Последните прволигашки дуели беа одиграни во декември кога клубовите заминаа на тримесечна зимска пауза. Водечки тим на табелата е Шахтар со 47 бодови од 18 натпревари, пред киевски Динамо со два бода помалку.
„Фудбалските клубови од Премиер лигата го поддржаа предлогот сезоната 2021/22 да се прекине, бидејќи не е можно првенството да продолжи поради продолжувањето на вонредната состојба. Состојбата на табелата од 24 февруари 2022 ќе биде конечен редослед, но никој нема да биде прогласен за шампион“, објави денеска раководството на украинската Премиер лига.
Одлуката треба да ја потврди Извршниот одбор на Украинската фудбалска федерација.
Двете првопласирани екипи, Шахтар и Динамо, ќе играат во квалификациите во Лигата на шампиони.
