Sвездата на Јувентус Кристијано Роналдо постигна два гола против Лион во реванш натпреварот од осминафиналето на Лигата на шампионите, но неговиот тим не успеа да напредува во следната фаза на турнирот.
Португалецот сепак има значителна утешна награда: ја заврши сезоната со вкупно 37 гола, со што го израмни рекордот на Феличе Борел за играч на „Старата дама“ кој постигнал најмногу голови во една сезона. Борел во сезоната 1933/1934 постигна 37 гола за Јуве во сите натпреварувања.
Спортските фанови и медиуми побрзаа да прослават „нов рекорд“ за Роналдо, споредувајќи го со оној на Ференц Хирзер од сезоната 1925/26 (35 гола на 25 одиграни натпревари), најверојатно несметајќи ги головите на Борел во сега веќе непостоечкиот Митропа куп (познат уште како Средноевропски куп).
Од 37-те гола на Роналдо сезонава, 14 се од белата точка. Тој запиша уште седум асистенции, а сезонава, по две години успеа да погоди и од слободен удар.
Во првата сезона за Јуве тој постигна 28 гола и 11 асистенции.
Уште поимпресивно е уште едно достигнување на Роналдо. Тој има 130 голови во ЛШ, што е точно колку што има Атлетико Мадрид во турнирот. Само 22 екипи постигнаа повеќе голови од Кристијано во најпрестижното клупско натпреварување.
Триесет и петгодишниот ас нема да игра во четвртфиналето за прв пат по 10 години. Интересно е што во сезоната 2009/10 тој повторно беше на губитничката страна по судирите со Лион, но тогаш со тимот на Реал Мадрид.