Вакцината против коронавирусот која ја развива фармацевтската компанија Pfizer ги помина тестовите за безбедност и ефикасност во раните клинички испитувања, покажаа новите истражувања.
Вакцината, од која Владата на Обединетото Кралство веќе нарача 30 милиони дози, сега е уште еден ветувачки кандидат за вакцина кои се сметаат клучни за запирање на вирусот. Вакцината досега помина низ рани испитувања врз луѓе спроведени во њујоршката компанија Pfizer и на универзитети и болници во САД.
Субјектите кои ја примија вакцината развија имунолошки одговор на коронавирусот и тоа подобар од оној што беше забележан кај луѓето кои се опоравија од COVID-19.
Исто така важно е да се напомене дека меѓу 36-те возрасни испитаници не се забележани никакви опасни несакани ефекти. Тие главно се пожалиле на главоболки и замор, јавуваат странските медиуми.
Вакцината Pfizer, наречена BNT162b1, е последна во серијалот која дава ветувачки позитивни резултати, бидејќи британските вакцини што ги развија Универзитетот во Оксфорд и Империјал колеџот во Лондон, исто така, покажаа рани знаци на успех во тестирањето кај луѓето.
Да се потсетиме дека Русија беше прва во светот што вчера официјално ја регистрира својата вакцина против коронавирус, но научниците се скептични во врска со безбедноста на оваа вакцина, за што нема детални податоци за тоа како работи и дали е сигурна. Светската здравствена организација не ја одобри оваа вакцина затоа што не ги помина пропишаните фази на тестирање.
