Фаворитот МЗТ или изненадувањето ТФТ, љубителите на кошарката ќе имаат можност вечерва да уживаат во домашна кошаркарска претстава во борба за драгоцениот пехар.
Ова ќе биде второ финале откако поранешниот Куп на Македонија стана Куп Благоја Георгиевски - Буштур во чест на поранешниот кошаркар, југословенски репрезентативец и спортски работник Благоја Георгиевски кој загина во сообраќајна несреќа на 29 јануари 2020 година.
МЗТ е бранител на тронот откако лани славеше во финалето победувајќи го Работнички. Годинава на патот до финалето ги минаа Гостивар (87:85) и Феникс (76:66).
За разлика од нив, за ТФТ ова е второ куп учество и прво финале. На патот ги елиминираа Пелистер (105:93) и ФМП Академија (94:72).
Натпреварот се игра од 19:30 часот во СРЦ „Кале“ каде според антиковид мерки е дозволено присуство на публика 50% од капацитетот на салата. Директен пренос ќе врши МРТ3.
Натпреварот ќе го судат И. Митровски, А. Феревски и Т. Панов, додека делегат е А. Угринов.
Доколку победи МЗТ тогаш ќе избие на првото место по бројот на освоени куп пехари бидејќи моментално е на делба на врвот со Работнички со по 10 титули.
Досегашни победници:
10 - Работнички (1993, 1994, 1998, 2003, 2004, 2005, 2006, 2011, 2015, 2019)
10 - МЗТ (1996, 1997, 1999, 2000, 2012, 2013, 2014, 2016, 2018, 2021)
2 - Еуро Никел (2008, 2010)
2 - Гостивар (2001, 2002)
1 - Вардар (2007)
1 - Кочани Деликатес (1995)
1 - Карпош Соколи (2017)
1 - Амак СП (2009)
