Данскиот велосипедист Матијас Скјелмозе успеа да влезе во првите десет во втората етапа на Трката околу Каталонија и покрај тоа што падна во бездна длабока околу 15 метри за време на настапот.
Скјелмозе не успеа да го избегне велосипедистот пред себе кој погреши влегувајќи во свиокот на спустот, по што беа снимени неверојатни кадри од неговото враќање на патеката.
Скјелмозе, кој заврши преку бетонска ограда, не само што преживеа, туку, откако се искачи на патот со велосипедот в раце, рече: „Добро сум, добро сум. Само дај ми нов точак“.
Сè се случи на 58 километри пред крајот на етапата долга 203 километри. Со помош на тимски колега, Данецот се врати на велосипед и ја продолжи трката како ништо да не се случило. Потоа, тој призна дека е среќен што поминал без повреди и додаде:
„Ако има нешто добро во паѓањето, тоа е адреналинот кој ве обзема. Не чувствував никаква болка. Се чувствувам добро, сигурно имав ангел чувар со мене. Имав многу среќа“, изјави Скјелмозе по трката.
