Двократниот светски првак во Формула 1, Холанѓанецот Макс Верстапен, го освои првото место во квалификациите за Големата награда на Мексико и ќе стартува од пол – позицијата на трката која е закажана за вечерва од 21 часот.
Зад Верстапен во првиот ред ќе стартува Џорџ Расел (Мерцедес), додека неговиот клупски колега, седумкратниот светски првак Луис Хамилтон, беше најбрз во првите две фази од квалификациите, но, сепак, ќе стартува од третото место.
Домашниот херој Серхио Перес (Ред Бул) беше четврти во квалификациите.
Верстапен, кој лани победи во Мексико, со евентуален триумф на патеката „Автодром Херманос Родригез“ денес би можел да постави нов рекорд според бројот на победи во оваа сезона. Со досегашните 13 победи, 25-годишниот холандски возач се израмни со Михаел Шумахер од 2004 и Себастијан Фетел од 2013 година, но сезонава има значително повеќе трки во календарот на Ф1.
За Верстапен ова е 19 пол – позиција во кариерата, а шеста во оваа рекордна сезона.
