Поранешниот напаѓач на Интер, Кристијан Виери, верува дека „Нераѕурите“ се во подобра позиција од „Росонерите“ пред нивниот полуфинален дуел од Лигата на шампионите в среда.
Откако Интер доминираше против Лацио, Верона и Рома во последните три натпревари, Виери верува дека тимот на тренерот Симоне Инѕаги е во подобра форма од Милан кој исто така релативно лесно го победи Лацио минатиот викенд, но ремизираше со Рома и Кремонезе во претходните два одиграни натпревари.
„Интер дојде на тој натпревар во подобра форма. Три натпревари, 9 бода, 11 постигнати голови, тие се во добра форма. Но, дали ќе го имаме Милан кој за малку ќе загуби од Кремонезе или оној кој лесно го победи Лацио? Интер е подобар затоа што има посилен тим, почнувајќи од нападот. Теоретски, не можат да загубат од никого“, изјави Виери.
Потенцијалното отсуство на напаѓачот на Милан, Рафаел Леао може да биде тежок удар за „Росонерите“.
„Тоа би му одзело 50 отсто од силата на Милан, повеќе или помалку. Тој и Тео се играчите што му даваат пресврт на Милан, особено на вакви натпревари. Леао е играч кој има способност сам да ја промени играта“, додаде поранешниот италијански репрезентативец.
Тој смета дека Лаутаро Мартинес може да биде клучот за успехот на Интер во двомечот со Милан.
„Фактите зборуваат сами за себе. Тој го освои Светското првенство, постигна 23 гола во Серија А. Дава голови кога и да игра. Леао имаше подеми и падови, но во последно време го испорачува она што се очекува од него“, заклучи Виери.
Натпреварот Милан - Интер се игра на 10 мај од 21 часот на „Џузепе Меаца“.