Десеткуваната руска автомобилска индустрија би можела да застане на нозе, но за кинеските производители на автомобили, извозот на возила во моментов е подобра работа од производството во Русија, пишува угледниот словенечки магазин Avto.
Кога меѓународните компании почнаа да ја напуштаат Русија по инвазијата на Украина, тајкуните Андреј Павлович и Андреј Олховски се приклучија на бранот претприемачи кои почнаа да купуваат западни фабрики за автомобили таму.
Сега сакаат да го оживеат производството во земјата, која на својот врв произведуваше околу 1,5 милиони возила годишно и некогаш сакаше да стане најголемиот пазар на автомобили во Европа.
Art-Finance на Павлович, кој купи фабрики од Hyundai и Volkswagen, и Avtodom Group на Олховски, купувачот на двете фабрики на Mercedes-Benz, сега бараат партнери во Кина, но нивните инвестиции се сомнителни без владини стимулации. Инаку, Mercedes беше многу популарен во Русија, а на отворањето на фабриката се појави и самиот Владимир Путин.
Но, да го оставиме минатото, бидејќи Кинезите се најдобрата шанса на Русите. Сепак, за кинеските производители на автомобили во моментов, извозот на возила е важен и поисплатлив од нивното производство во Русија, каде државата треба да обезбеди бројни поволности.
Иако сумата што Павлович и Олховски ја потрошиле за купување не е позната, се верува дека средствата биле далеку под вредноста на фабриките пред инвазијата на Украина. Без разлика, изгледите за овие инвестиции се неизвесни.
Art-Finance на Павлович, кој работи како AGR Automotive Group, објави во соопштение минатиот месец дека го продолжи производството на моделот Solaris во поранешната фабрика на Hyundai, без да открие колку автомобили ќе бидат произведени.
Avtodom, сепак, сака да привлече партнер од Кина за рестартирање на поранешната фабрика на Mercedes-Benz, но нејзината релативно мала големина ќе ја отежне профитабилноста, рече Олховски.
Другите фабрики за автомобили полека застануваат на нозе. Во некогашното Renault, со кое денес раководи градската управа на Москва, го оживеаја производството на брендот Москвич од советската ера, кој ги склопува моделите на кинескиот JAC Motors. Тие моментално бараат друг кинески партнер, објавија локалните медиуми овој месец.
Autotor, операторот на фабриката за склопување на Hyundai и BMW, ги произведува кинеските модели BAIC и Kaiyi, но и двата произведени со околу една шестина или помалку од целосниот капацитет минатата година.
Great Wall Haval е единствениот кинески производител на автомобили кој има фабрика во Русија. Фабриката во која се произведуваат теренци и кросовери е отворена во 2019 година, а со инвестиција од 500 милиони долари лани го удвоиле производството на околу 100.000 возила. Потоа, тука е Avtovaz, кој лани произведе приближно 374.000 Lada возила со државна поддршка.
Иако продажбата на автомобили е зголемена во 2023 година, ќе биде потребно долго време за да се рестартираат сите фабрики што не работат. Руските власти создаваат нов автомобилски кластер за заживување на локалното производство, но Банката на Русија проценува дека процесот на враќање на целосно производство веројатно ќе трае до 2027 година.
Понатамошниот раст на производството на патнички автомобили во Русија ќе биде поврзан со развојот на домашната автомобилска индустрија и зголемувањето на бројот на договори за склопување на автомобили од пријателски земји во домашните погони, се вели во извештајот.
