Останките од две лица се пронајдени во урнатините на Помпеја, древниот римски град кој исчезна во ерупцијата на Везув пред 2.000 години, соопшти италијанското Министерство за култура.
Според министерството, скелетите се пронајдени во Куќата на љубовниците и најверојатно се на двајца мажи на возраст од 50 години кои загинале во земјотресот што следел по ерупцијата.
Директорот на Археолошкиот парк, Габриел Цухтригел, изјави дека тие не починале од вулканска пепел, туку од уривање на ѕидовите, чии фрагменти биле пронајдени меѓу нивните згмечени коски.
„Современите техники на ископување ни помагаат подобро да го разбереме пеколот што ја уништи Помпеја за два дена, убивајќи ги жителите“, вели германскиот археолог.
Во 79 година вулканот еруптирал и го уништил градот
Околу 13.000 луѓе живееле во Помпеја, околу 23 километри југоисточно од Неапол, до 79-та година, кога вулканот еруптирал со сила еднаква на многу атомски бомби. Најмалку 15 до 20 проценти од населението умреле. Во последните два и пол века, археолозите пронајдоа останки на повеќе од 1.300 жртви.
Локалитетот Помпеја е откриен дури во 16 век, а денес е место на голема археолошка активност во обид да се запре долгогодишното запоставување и распаѓање, овозможено со финансиски проект на Европската Унија од 105 милиони евра.
Италијанскиот министер за култура Џенаро Санџулијано рече дека конзерваторските работи и понатамошните истражувања продолжуваат.
„Откривањето на овие два скелети ни покажува дека имаме уште многу да истражуваме, да спроведеме уште многу ископувања и да пронајдеме уште многу остатоци“ од огромно богатство за истражување, рече тој.
Помпеја е впишана на листата на светско наследство на УНЕСКО и е втора најпосетувана туристичка дестинација во Италија по Колосеумот во Рим.
