Украинската фудбалска ѕвезда Андриј Јармоленко откри дека ги прекинал врските со својот поранешен соиграч Анатолиј Тимошчук поради одбивањето на поранешниот фудбалер на Шахтар и Баерн да ја осуди руската инвазија на Украина.
Тимошчук доби многу критики за неговиот молк откако Русија ја нападна Украина. Некогаш беше капитен на украинската репрезентација, а денес го нарекуваат предавник на својот народ. Во родниот град Луцк го доживеа најголемото можно понижување со тоа што е прогласен за персона нон грата и беше одземена титулата почесен граѓанин.
И покрај воената агресија на Русија против Украина, Тимошчук остана да работи за Зенит и не сакаше да се изјасни за војната во својата татковина. Комитетот за етика и фер игра на Украинската фудбалска федерација му ја одзеде тренерската лиценца, сите титули и почести, а сега и Јармоленко го прекина пријателството со поранешниот играч за врска.
„Го прашав: 'Како спиеш ноќе?', а тој одговори: 'Не спијам'“, изјави Јармоленко во изјава за YouTube каналот КраСава.
„Потоа тој ми се јави. Му реков: „Порано ми беше пример, сега си ништо'. Потоа ми рече да одј*бам, а јас му го кажав истото“, изјави фудбалерот на Вест Хем.
Тимошчук во дресот на украинската репрезентација одигра дури 144 натпревари и постигна 3 гола, со што до ден денес го држи рекордот за најмногу одиграни натпревари за оваа репрезентација. Овој некогаш одличен играч за врска кариерата ја почна во Волин, потоа играше за гигантите Шахтар, Зенит и Баерн, а кариерата ја заврши во 2016 во казахстански Каират. За Украина играше на Мундијалот 2006, како и на ЕУРО 2012 и 2016.
Денес работи како помошник тренер на Сергеј Семак во Зенит од Санкт-Петербург.