Претседателот на Србија Александар Вучиќ синоќа на својот Instagram профил објави ново предизборно видео кое некои го сметаат за „смешно“, а други за „бизарно“.
Во видеото млад брачен пар гледа телевизија, па почнува кампањски спот со Вучиќ и жената на шега вели: „Фали уште од фрижидер да ни излезе“. ПР тимот на Вучиќ играл баш на оваа „фора“, па Вучиќ навистина се појавува од фрижидер и ги набројува успесите кои се постигнати во претходниот период.
„Дали навистина излеговте од фрижидерот?“, вели не толку изненадената жена.
„Знам, извинете, но за мене е важно да допрам до секој граѓанин на Србија. Има уште многу да се направи“, одговара Вучиќ, кој потоа наведува што е сработено и што останува да се заврши.
На крајот од видеото, додека се подготвува да ја стави питата во рерна, жената вели: „Ви благодарам, но ве молам не излегувајте од рерната“.
Вучиќ е претседателски кандидат на изборите на 3 април.
Спотот наиде на измешани реакции во јавноста, но едно е сигурно - ретко кој го нема видено, како „фора“ или не.
