Нискотарифната авиокомпанија Wizz Air ќе воведе нови летови од Скопје за Салцбург од 3 јули, а од Белград и Тузла за Салцбург од 2 јули.
Порталот Exyuaviation.com објави дека авиокомпанијата ќе лета двапати неделно од овие градови со авион Erbas A320.
Веста доаѓа само еден ден откако авиопревозникот соопшти дека во јули ќе воведе летови од Милано до Приштина.
Wizz Air соопшти дека по кризата со пандемијата на коронавирусот ќе побара нови прилики и таму ќе ги насочи своите капацитети, додава Exyuaviation.com.
На овие три линии авиокомпанијата нема да има директна конкуренција, иако Air Serbia лета на линија Ниш-Салцбург.
„Свесни сме дека ќе има краток пад на побарувачката поради коронавирусот, па ги намалуваме капацитетите во склад со тоа, но не затвораме ниту една рута или база“, изјави основачот на Wizz Air Јожеф Варади во врска со новата одлука.
Тој додаде дека само ја намалуваат фреквентноста на летови на одредени линии. Исто така истакна дека продолжуваат да нарачуваат авиони и дека до јуни ќе има 22 нови нарачки, со што флотата на компанијата значително ќе се зголеми, па затоа воведуваат нови рути, а можеби и нови бази.
Во април, Wizz Air ги соопшти новите дополнителни мерки за хигиена што ќе ги применува авиокомпанијата од 1 мај: екипажот и патниците да носат заштитни маски, да се одржува физичка дистанца пред чекирање, како и при влегување и излегување од авион, а на летови каде што ќе има можност ќе се обезбеди и оддалеченост помеѓу седиштата на патниците.
„Со цел да се осигура дека здравјето и благосостојбата на патниците и екипажот останат непроменети, Wizz Air воведува нови протоколи – во согласност со владините регулативи – да се почитува физичката дистанца за време на чекирање и да се подобри хигиената на летот. Како дел од мерките за заштита на здравјето на патниците и екипажот на авиокомпанијата, патниците треба да се чекираат и да ги купат сите дополнителни услуги онлајн, како на пример плаќање дополнителни торби, за да ја намалат интеракцијата на аеродромот. Употребата на киосците за самостојно оставање багаж – таму каде што е достапно – и брзите ленти за безбедност на аеродромите, се високо препорачани од страна на авикомпанијата за понатаму да се обезбеди и физичка дистанца пред чекирање во авионот. За да се спречи можноста за ширење на инфекција, најучтиво се замолуваат сите патниците да се придржуваат на новите правила за физичка дистанца при влегување и излегување од авионот“, стои во соопштението од авиокомпанијата од април.
